Natur

Stori Bywyd

Yn gryno ac eto’n amrywiol, mae ein tirwedd byw werthfawr yn byrlymu â bywyd drwy’r flwyddyn. Ac nid oes rhaid i chi fynd ymhell i werthfawrogi lliwiau a seiniau ein trigolion mwy gwyllt.

Ceir brigiadau unig, coedwigoedd dwys a mwy o deithiau cerdded trwy goetiroedd nag y gwyddoch beth i wneud â nhw. Mae taith trwy ein tirwedd yn gyfle i beidio â’i golli i weld ein bywyd gwyllt bendigedig. A chyda pheth wmbredd o blanhigion, adar, anifeiliaid a bywyd môr, rydych yn sicr o weld rhai hoff bethau cyfarwydd, ac efallai rhai pethau i’ch synnu.

Mae Coedwigoedd Bodlondeb yn nhref Conwy yn goetir heddychlon gyda golygfeydd godidog o’r aber o’i ardaloedd agored. Mae’n byrlymu ag amrywiaeth o rywogaethau coed gan gynnwys derw, onn a cheirios, a thrigolion eraill yn cynnwys llwynogod, gwiwerod a gweilch gleision.

Mae gan Goedwigoedd Pwllycrochan, sy’n ymestyn dros lechweddau Bae Colwyn, goed collddail brodorol gan mwyaf gyda rhywogaethau eraill yn cynnwys castanwydd melys a phinwydd. Ceir digon o leoedd coediog eraill i ymweld â nhw hefyd. Mae gan bob un ei gymysgedd unigryw ei hun o drigolion.

Mae taith fer yn y car (neu grwydr) i dir uwch yn mynd â chi i dirweddau oriog Pensychnant gyda’i ferlod gwyllt prydferth, a gweision y neidr prin ar y llyn bach ar ben y bryn.

Mae toreth Pen y Gogarth o fywyd gwyllt yn cynnwys ieir bach yr haf a bywyd planhigion prin, gyr o eifr Cashmir sy’n crwydro’n rhydd a chytrefi mawr o adar môr, o wylanod coesddu i fulfrain. Cadwch lygad barcud allan o’r clogwyni. Nid yw’n anarferol gweld ambell i forlo, llamhidydd neu ddolffin trwynbwl yn nyfroedd arfordirol Môr Iwerddon.

Mae dros 200 o rywogaethau o adar wedi’u nodi yng Ngwarchodfa RSPB Conwy ar ddŵr a glannau’r aber. Gellir gweld llawer o amrywiaethau cyffrous yma ar hyd y flwyddyn. Gyda llwybrau cerdded, arsyllfeydd, teithiau cerdded tywys a llwybrau arbennig i bobl ifanc, mae’n ddelfrydol ar gyfer adarwyr profiadol a newydd.

Mae ffermdir yn gwneud cryn dipyn o gefn gwlad Conwy. Ac mae yna ddigon o lwybrau cerdded wedi’u marcio i’w dilyn trwy fryniau tonnog glas a dymunol. Chwiliwch am bethau prin fel y dylluan wen neu rywogaethau fel dyfrgi a llygoden y dŵr gerllaw afonydd a nentydd.

O warchodfeydd natur i anialwch anghysbell ac afreolus, mae cynefinoedd amrywiol Conwy yn hardd ac yn doreithiog ar hyd y flwyddyn. Ffrwydrad o fywyd newydd yn y gwanwyn, blodau a chân yr adar yn yr haf, lliwiau cochfrown euraidd yr hydref a thirweddau prin y gaeaf. Ewch i wisgo’ch esgidiau cerdded a gweld dros eich hun!

Mawr a bach

Ewch i ddarganfod y rhywogaethau amrywiol o blanhigion, anifeiliaid ac adar ym Mharc Gwledig y Gogarth. Mae gan y ganolfan i ymwelwyr ar y copa wybodaeth am beth i chwilio amdano, ac mae’n dweud hanes y dirwedd unigryw hon. Ewch i ddarganfod mwy yn www.conwy.gov.uk/countryside.

Ymweliad â natur

Mae Gwarchodfa Natur RSPB Aber Conwy yn lle da i weld adar a bywyd gwyllt lleol ac mae yna flwyddyn lawn o ddigwyddiadau. Trowch at www.rspb.org.uk i gael mwy o wybodaeth.