Bwyta ac Yfed

Blas Gwych

Ydych chi’n chwilio am le gwych i fwyta? O fwyd cysur grymus i ddanteithion o’r safon uchaf, samplwch y lletygarwch lleol ac fe welwch pam y mae gan y rhan hon o’r byd enw mawr ar y map coginio.

Cynnyrch wedi’i Dyfu Gartref

Mae bwyd da yn rhan fawr o’n diwylliant yng Nghymru. Mae ein hardaloedd helaeth o laswelltir ffrwythlon ynghyd â hinsawdd berffaith i dyfu pethau, yn rhoi rysáit ar gyfer rhai cynnyrch o safon hynod flasus. Mae ein cig eidion du Cymreig a’n cig oen morfa heli yn enwog ym mhedwar ban byd. Ac mae ein morlin bron di-ben-draw yn gwneud y rhan hon o Gymru yn wlad bwyd môr bwysig hefyd. Mae ysbinbysgod y môr, cimychiaid a chregyn gleision lleol ar y bwydlenni gorau i gyd.

Os ydych yn dymuno coginio rhywbeth eich hun, mae digon o leoedd i chi brynu cynhwysion o safon. Mae yna amrywiaeth wych o siopau cigydd, pobydd a groser teuluol sydd wedi’u hen sefydlu, a llond dwrn o siopau delicatessen newydd, sy’n stocio’r bwydydd arbenigol gorau o Gymru. O selsig arobryn i’r bara lawr enwog a chaws a gwin Cymreig. A chyda’n golygfeydd trawiadol, pa ffordd well o fwynhau’r danteithion lleol na bwyta yn yr awyr agored? Mae picnic ar y traeth neu ar dir uwch wir yn gwneud y gorau o’r ardaloedd hardd hyn.

Bwyta Allan

Os oes yn well gyda chi adael y gwaith caled i rywun arall, nid oes rhaid i chi fynd ymhell i ddod o hyd i’r lleoedd gorau i fwyta. Mae’r rhan hon o’r byd dan ei sang â chyrchfannau bwyd gwych sy’n cynnig y briodas berffaith o fwyd a diod. Mae tai bwyta, bwytai cwrw a gastro-dafarndai rhagorol yn cynnig bwydlenni helaeth gyda chynhwysion lleol, dewislenni gwin ystyrlon a chroeso Cymreig twymgalon.

Rydym yn dwli ar ein cynnyrch wedi’i dyfu gartref ac rydym yn falch o’i rannu â gweddill y byd. Ond rydym hefyd yn hoff o liwiau a blasau coginio byd-eang. Os ydych chi’n hoffi bwyd rhyngwladol hefyd, chewch chi ddim eich siomi â’r amrywiaeth o dai bwyta gwych sy’n gweini bwyd o bedwar ban byd.

O brydau traddodiadol yr oedd ein cyndeidiau’n eu mwynhau, i’r datblygiadau diweddaraf mewn bwyd. P’un a ydych yn dewis bistro prysur neu brofiad bwyta mwy coeth, yr arwydd mwyaf dibynadwy o le da i fwyta yw bod y trigolion lleol yn bwyta yno hefyd! Pwy a ŵyr? Gallech hyd yn oed ddarganfod trysor cudd y byddwch am ei gadw i chi’ch hun.

Blas ar Gymru

Bob blwyddyn, rhoddir Gwobrau Bwyd a Diod y Gwir Flas i gynhyrchwyr bwyd a diod gorau Cymru a’r mannau gorau i fynd allan i fwyta yng Nghymru. Ffoniwch 0845 010 3300 neu trowch at www.walesthetruetaste.com i gael mwy o wybodaeth.